Na in patoi i di konmsa : « Bondié i pini pa galé ! ». Moin pèrsonèl, mi pans pa Bondié la mèl la-dan vi k’li doi an avoir tro pou li fèr. Toulfason, sa sé rienk’in manièr kozé, pa plis ké sa : in n’afèr k’i fo pa prann, konm diré le kont, o premié dégré...

Zot l’apré demandé ousa mi vé alé, kosa mi vé dir, dé koué k’mi koz. É bin ! Pa plis ni moin ké sak zot la antann dann radio, sansa dann télé. Pa plis ni moin ké sak zo la lir dann zournal, si zot la lir zournal épi si z’afèr konmsa i intérès azot. Finn kont, mi vé anparl zistoir l’amann bann pétrolié la gingné pou rézon zot noré roul Air-France kari sou d’ri... I prétan zot la antann azot rantre zot pou plime lo zoizo an fèr. Zot noré fé in lantant pou vann lésans lavion pri for.
Koman-koman, Air France la rann ali kont lavé in kékshoz pa normal épi li la mète l’afèr dan la min la komission la konkirans. Lé vré sa la pa fé an in zour, mé bann konpagni la fini par gingn in l’amann : 41 milion l’euro... La pa in kréyon déyèr l’orèy ! Plis ankor, si Air-France i vé, èl i pé demann domaz-intéré.

Lé vré, lo bann pétrolié i di zot va domann apèl pars i paré zot lé pa dakor !
Moin, pou mon par, mi ansouvien kan la fé la grèv lésans, déssèrtin té i di k’i fo karsèr la réjion pars la-ba mèm nana in gato pou pran, in bèl gato ankor. Mé zordi, mi domann amoin si in pé la pa tronp landroi. Si i fo pa zot i réviz in pé zot poinn vi déssi la késtionn landroi ousa le bèl gato i lé ! Sré pa dann kofor bann pétrolié plito ?

Justin