Dizon kan in momon néna plizyèr zanfan é k’èl i yème toute parèye — in bon momon lé konmsa — mé sirésèrtin èl i sava pa okipe tout mèm fasson. Sa lé normal pars èl i panss sak lé pli kosto, pli débrouyar, pli malin la moinss bézoin lo soin — sak lé in pé malade-malade, sak lé shétif, sak lé mwin gaté par la natir, zot la pliss bézoin lo soin, donk lo momon va okipe pliss sak èl i panss la pliss bézoin son soin.

Issi la Rényon lé in pé parèye. Néna sak i gingn débrouye son kari par li-mèm épi sak la pliss bézoin momandoné i okipe ali in pé pliss… An parmi sak la pliss bézoin lo soin nou va di néna sak lé malade, sak la natir la lèss ali in pé an aryèr, sak la sossyété la obliye in pé, sak lé in pé avanssé an laz é i sèye débate san bien ansorte azot dan la vi.

Mézami zot i panss pa sète ané i fodré ni okipe in pé lo bann moune atèr dann la sossyété rényonèz késtyon d’mète azot in pé pliss anlèr… Alon panss toute bann zanfan-la moityé an parmi-la malshanss i vé ké zot lé né dann in famiye pov. La malshanss i sava suiv azot toute zot vi : sé zot i sava pa gingn toultan manzé an kantité épi an kalité, zot i sava pa gingn vakanss konm i fo, zot nora poin non pli in bone formassion é sé zot i sava ranpli o firamézir lo gran bassin la povrété.

Si ni ropran la parabol lo bon momon, sak i yèm parèye toute son bann zanfan, mi trouv momon-la — lo péi si zot i vé — i dovré okipe an promyé toute sak i tourn, i vir, i ranpli lo bassin la povrété. Pétète si ni komanss par-la ni arivré a myé konbate la mizèr… I fodré galman ni arète anparl de zot konm bann profitèr la sossyété — konm bann parazite. Si ni shanj noute manyèr oir banna, pétète zot vi i pouré shanjé

A bon antandèr, salu !

Justin