Apré domin sétadir lindi 9 Mars la kampagn éléktoral pou zéléksyon déparmantal i sar rouvèr ziska dimansh 22 pou lo promié tour é pétèt si néna in dézyinm tour pou désertin i rotourn lo 29 mars in sominn apré. Lo tan pou lo bann kandida pass kaz an kaz pou diskit si shakinn son program, sak néna, war lin a lot pou éspliké touzour poukoué nou lé anparmi ? Koué i ansèrv alé voté dimansh ? Kèl rol nou néna pou zoué andan la ? Sé koué lo nouvo lasanblé, in kokyi plin ousinonsa in koyi vid ? Ziska zordi nou na pwin tro répons.

I prétan ziska 2016-2017 na kontinié gard tout konpétans konsèy zénéral néna ziska zordi, apré sa va war. Si la késtyon alé voté, ousinonsa rèt son kaz, mi antann désértin i di pou rézon sa in zéléksyon i kont pa, néna i fé zanbrokal, mi konpran pa é walali-é walala. Pa pousa i fo rèt son kaz. Lé vré pou vréman lé pa fasil pou désértin, konm néna kanton lé an sibémol, lé si trwa vil, in morso dinn par koté, lo milié in ot o sant é in ot kartié lot vil si lot bout. Mi diré tousa lé fé éxopré pou boush lo zié domoun.

Sanm pou mwin nout sèl kontantman zordi sé lobligasyon an awar otan boug ké fanm si lo tiké, par réspé pou la parité. In boug, in fanm konm titilèr, in boug in fanm konm sipléan. Donkalor nora otan konsèyè bononm ké konséyé madam. Si ni aplik byin zisko dérnié dogré, i dovré awar osi lo landmin zéléksyon minm kantité prézidan ké prézidant, pousa na war pli tar minm si zordi mwin néna doutans. La lwa i prévwa la parité, mé sanm pou mwin, konm si pou in pé, sora difisil aplik la parité zisko bout !