Dann la politik, konm dann biznès épi dann la vi tou-lé-zour nana in bonpé dmoun i done parol. Rosh i kraz amoin si mi réspèk pa mon parol. Kozé lé bon mé tro kozé la pa bon. Afèr mi di sa ?

Pars si zot i frékant in pé bann rézo sosyal, zot i pé oir an dirèk bann rotournèr d’vèst. Zordi zot i apiy inn, mé yèr zot téi apuiy in n’ot, é avan-yèr zot té apiy ankor d’ot moun k’i pans pa parèy mé i diré sa i zène pa zot. Domann azot z’ot trasabilité, moin lé sir sa i mank ar pa d’étone in pé.
In tèl té indépandantis ; aprésa li la rant ékolozis ; aprésa ankor li la sign in pakt lo san avèk la droit. Domin li sar avèk kisa, pou kisa, kont kisa ? I diré an plis zot nana in bone konsyans. Pou kosa d’apré zot ?

Sanm pou moin la pa si fasil ké sa pou konprann sa. Zot va dir amoin sé par l’intéré mé son fil rouj la touzour été l’intéré osinonsa non ? Li na kékshoz pou gagné ? Mi koné pa mé lo pèp kosa li konpran dann tout so tourné-viré ?
Sak mi koné sé ké pou done parol zot lé for : donn in parol zordi, donn in n’ot domin, donn ankor in n’ot apré-domin. Pou zot, parol doné, konm di lo kont i kont solman pou la po patat.

NB Si zot i vé, zot i pé suiv lo tourné-viré in pé dsi facebook. Sa in bon n’afèr pou suiv la trasabilité inn-dé politik.