Oté

« La parol i pouri pa ! » 

In kozman pou la rout

Justin / 28 octob 2020

JPEG - 43.6 ko

Mézami, mi pans, zot osi konm moin, ni fé konfyans la parol doné. An touléka, pou nou sa sé in prinsip lé vré dan la vi privé, konm pou la vi piblik. Poitan, dann la vi piblik dopi in bon koup de tan ni apèrsoi la parol doné sé plito in parol zété. Lé vré désèrtin i di promèss sé dète, mé pou rapèl azot sa lé bien difisil pars défoi zot i réponn pi téléfone. Moin la koni in tan, kan in kandida téi pass la kaz demoun lo zéléktèr téi di ali : « Moin la fine done parol intèl é sa lété konm in poin d’onèr. ». Alor kan mi lir kozman moin la mark an-o la i di konmsa la parol i pouri pa, mi aprésyé pars lé domaz mé souvan dé foi moin la vu ali pouri. Ousa i lé out prèv ? Mon prèv sé sak moin la antann avèk mon prop zorèye é téi sort dann son prop boush. I pèz pa lour ? Domaz pars té in bon prinsip de vi an sosyété. Alé ! mi kite azot rofléshi la dsi é ni artrouv pli d’van. Sipétadyé.