Si mi tronp pa,sa in provèrb l’Afrik mé konm mi di toultan sak lé vré pou L’afrik, lé vré partou .Sa i vé dir, in mové kozman sé in n’afèr i obli pa. Néna in n’ot provèrb, pli for ankor, i di konmsa :l a mark lo kou i éfas mé la tras mové kozman sa i éfas pa zamé. A ! Mové parol !Mové kozman ! Lé fasil pou dir, mé lé dir pou ankésé.

Mon défin papa téi di : « La boush désèrtin lé tayé pou dir movèz shoz ! ». Sa lé vré pou vréman sa : pou in pé dir in mové kozman sa lé konm in dézyèm natir é la plipar d’tan lo moun i di, li kalkil pa la konsékans.In n’ot afèr moin la romarké : na d’moun lé bète konm la line de mars lé ron, mé pou di mové zafèr zot lé sipèrdoué.i diré sa sé zot karbiran la tète. Kan zot i koz pa zot i kalkil é kan zot i kalkil antansyon déga.

Alé ! mi kite azot rofléshi la dsi é ni artrouv pli d’van.

Sipétadyé !