Oté

La pasians i geri la gal

Vanessa / 21 mars 2019

JPEG - 43.6 ko

Wopé marmay, zot la fine retrouv azot dann in fotrin, ousa le semi le mo « la pasians i geri la gal » i tonm dann konprenur ? 

Lér, mi sava la post, pou fe in transfér kourié. Oté, demoun an poundiak, demoun an ni d gép. Moin la pa abandoné. Moin la bezoin fé in transfér kourié. Le tiktak le fasil : ou i donn out non, lansien ladrés, le nouvel ladrés. 
Wopé, marmay trant minut pou fé le papié.

Trant minut, le tan le zanployé i konpran koman i ranpli le bann papié, trant minut pou anpliskésa fé pey aou 30 lero. Ou i demann aou akoz toultan néna kelele la post, ou i demann aou akoz demoun i pérd pasians ? 

Pourtan navé 4 moun té i travay zour la, pou inn buro kartié, lé pa mové 4 moun. 
Voilapa, le moun i bit su konm li di « in lojisiel li kone pa tro », li di aou, arvien in proshin kou sansa fé le zistoir transfer kourié out kaz si le sit ek internet.

Ousa nou sava ? 
Non, i tienbo, i atann. La pasians i geri la gal. 

In majinasion la pas dann mon koko, 30 minut, kosa moin noré gingn fé pandan trant minut olerk asper li gingn manie son zoutiy travay ?
Po sat lé gabié an spor, li gingn, an trant minut, bat karé 2 kou basin vital. Po sat i yinm fé kui manjé, le tan fé in gato tison. Po bann demoun lé konékté, zot néna le tan fé 7-8 ti film Tiktok. Po sat i yinm lir, zot néna le tan lir omoins 3-4 lartik. 
Azot, kosa zot, zot i gingn fe an trant minut ?

Alor, mi invite azot rofléshi la dsi é ni artrouv pli d’van. Sipétadyé !

Vanessa