Mésyé, médam, la sosyété, bien sir zot konm moin, ni koné sa in provèrb kréol rényoné .I fé lontan ni antann sa é mi pans la pa fini pars sa sé in kozman ni yèm bien isi La Rényon. Mé kosa li vé dir pou vréman ? L i vé dir la pasyans i pé géri la gal ? Mi pans pa pars la gal sé in salté d’maladi d’po. In zour in moun la di amoin pou géri la gal la poin médikaman, alor ou i pran out mal an pasyans. Aspèr aou épi in zour la gal v’arété ! Si sak li di lé vré, sa i vé dir la pasyans sé in bon médikaman pars li ariv o bout la gal… avèk lo tan. Si na poin médikaman-si l’avé poin dann tan, lo tan la pa in médikaman é la gal i pass par èl mèm apré kéktan. Moin pèrsonèlman moin la konète kan moin lété jenn demoun téi pran lo bin sink kalité fèye pou sa. Rézilta ? Mi koné pa ozis ! Alor nout kozman, sé pou dir si ou néna in tablatir ou na ka pasyanté. Soi li pass, soi li pass pa é moin pèrsonèl, dann in ka konmsa, mi pans kosa moin la ? Sanm pou moin, i pans pa arien sof ké nnéna dé shoz i pass avèk lo tan épi d’ot non. Alé mi kite azot rofléshi la dsi é ni artrouv pli d’van. Sipétadyé !