Médam, Mésyé, La sosyété, koz èk moin sé koz èk in kouyon, mé sé o pyé d’lo mir k’i oi lo mason. Mé zami, mi sort lir dsi l’internet in kozman bann zindien té i di konmsa : « La pasyans sé lo mètr lo tan. ». In gayar kozman an vérité mé sa la fé pans amoin fé rolèv nout kozman kréol rényoné moin la mark an-o la. Moin la fine anparl sa mé in foi anplis la pa an tro. Astèr kosa sa i vé dir ? Pou moin sa i vé dir la pasyans i règ in bonpé problèm ou i pans i gingn ar pa réglé zamé é sa lé bien vré. Pars o final néna problèm la pa problèm ditou, pars si i lèss in pé ropozé li disparète par li mèm. Sa lé vré pou pb rant paran épi zanfan, rant voizin sirtou si ou alime pa d’fé dsou tazantan. Ou i alime pa d’fé, marmite i rofroidi épi lo problèm ké lé la li règ ali par li mèm ti dousman-si ou i alime dofé, marmite i ésploz… Mi souvien in shanté Gilbert Bécaud téi parl bann problèm insirmontab é téi di poz ali la dsi la tab é lo tan va règ ali. Alé mi kite azot rofléshi la dsi é ni artrouv pli d’van. Sipétadyé.