Mi sort lir in l’artik in l’ékonomis l’afrik dsi lo fran CFA. Dann l’artik-la lo moun, in sèrtin Kako Nubukpo i krétik lo fran CFA é sak solon li sé lo bann konsékans in sistèm l’arzan périmé i pé an avoir dsi l’ékonomi bann péi afrikin. I fo ni oi sa, nout tout ansanm, mé pou zordi mi rotien lo kozman. Dabor pars nout tout, kan nou l’avé in an par-la, nou la gingn in sakré l’anvi d’marshé é malgré k’nou la tonm plizyèr foi, nou la aprann marsh dsi nout dé pyé. Mi pans, dann tout sirkonstans la vi, momandoné, si ni vé alé pli loin, si ni vé alé pli o, i fo ni kass kolé la pèr. Pars san sa ni pé pa alé an avan, ni pé pa fé d’progré. Sa lé valab pou in moun, pou in pèp, pou in péi, mèm pou lo mond antyé. Mon bann dalon, si mon kozman i fé travaye tro z ’ot tèt, mi pans sa lé bon pou zot. Fé travaye son tèt sa lé bien nésèsèr, sa lé bien itil. Ni artrouv pli d’van si pétadyé !