Oté

La pèrt in famiy, la pèrt in dalon, Sa i fé mal. La pèrt in péi in blésir i fèrm ar pa zamé

Justin / 19 octob 2018

JPEG - 43.6 ko

Bancoult avèk Lisby la vni pou in pti sézour isi La Rényon. Bancoult, zot i koné sé lo shèf bann shagosien. Lisby Elizée, zot la antann aèl dann télé kan prosé La Haye la éspasé. Banna i vien tazantan La Rényon é sa sé in n’afèr ni aprésyé bonpé pars dopi in bon koup de tan nou la fine mète dann nout lidé ésplik lopinyon lo problèm Shagos, épi ède banna tanpir k’ni pé pou zot gingn rotourn dann z’ot péi natal.

Banna lé né dann Chagos é zot vyé famiy la pass plizyèr zénérasyon laba ziskatan bann zanglé, pou pèrmète bann z’amérikin fé in gran baz militèr dann Diégo Garcia – dann locéan indien a popré dé mil kilomète distans par raport a nou... Pou fé sa, san rézon, la déport tout bann chagossien téi arèst dann bannzil la : in paradi dann tan-la, zordi pétète in paradi mé pou d’ot sirman pa pou bann shagosien.
Pou zot Chagos sa in l’archipèl du sagrin, in plé dann zot i fèmr ar pi zamé. In pé rant banna i di dopi z’ot déportasyon donk dopi sinkantan, la pa pass in moi, in zour, in minute zot l’arète pans z’ot péi. Zot i di osi zot bizin rotourn dan z’ot péi. Zot i pé pa fé konmsi z’ot péi i égzis pa, li lé la dé mil kilomète solman mé zot lé konm interdi d’sézour.

In plé sa i sikatriz an zénéral. In boubou sa i géri mé la pèrt in péi sa i sikatriz pa, sa i géri pa. Lo tan i pass é la doulèr lé la. Lo tan i pass épi lo blésir lé la. Ou i pé grandi, ou i pé viéyi, ou i pé mor mé doulèr lo péi pèrdi sa i pass pa zamé.
La pèrt in famiy sa i fé mal. La pèrt in dalon sa i fé mal. Mé la doulèr pèrd son péi sa sé in n’afèr mi sipoz konm in blésir i sikatriz pa zamé, konm in boubou zamé i géri pa. Kan in frèr lé atèr, kan in sèr lé atèr, la pa bézoin rofléshi, la pa bézoin kalkilé ; zis ède ali pou li arlové !