Na poin lontan, minis l’édikasion nasional lavé désid mète an fish bann marmay lékol : si zot i vien lékol, si zot i bash lékol, si zot i antan bien èk lé z’ot marmay sansa non, si zot i antan bien avèk z’ot mètr lékol. In bo pé l’assosiasion la komans kriyé, akoz pou zot, lété riskab amène l’annuiman bann zanfan épi bann paran. Moin la antann dir, lo ministèr la konm rononsé fé in n’afèr konmsa... Si lé vré, tan mié ! Mé antansion, gouvèrnman-la nana vilin manièr.

La prèv ? Bin ala èl la : minis lintérièr so kou issi la déside mète an fish bann marmay trèzan lé riskab, in zour, èt délinkan. Moin lé sir, in pé va bate la min, va di sa in bon désizion. Zot la fine kalkilé an parmi bann demoun la fé in n’afèr d’bien dann z’ot vi, konbien té in pé voiyou kan lété jène ? Zot la fine rodé si dann bann vip koméla, lavé poin dann tan lontan bashère lékol, volèr mang, fimèr lo join, tétèr la rak épi in zour l’arété. Si lavé mark z’ot nom dann in baz informatik, zot i kroi pa shomin banna nora été anbaré ? Moin mi pans konm sa !

Alor, arète avèk so manièr mète demoun dann mashine. Moin la di é mi ardi : « Marmayé kodbaré, marmay malbaré ! » mé, malérèzman, in pé na poin arienk in mani, zot nana la maladi mète bann jèn dann fishié informatik.

 Justin