Lo tan folklorik
Bann gran grèk lé paré pou dir sa té dann in tann folklor. Anpèsh in bazardyé na la répitasyon d’ète in kominis vann son léguime dann bazar, arète in plantèr pou in oui, pou in non, pou in rou soidizan lis, pou in kamyon kann mal sharjé, anpèsh lo mor pass légliz, sa lété folklorik. Frodé, bour l’irne, pou mète anlèr lo kandida la droite, sa in pur folklore, mi di azot. Done lotozizasyon bann nèrvis pou kassé brizé, bonbarde la kaz kou d’galé, sa ossi lété nout folklore bourboné. Anvoy bann militan rouj dor dan la prizon, rofiz déssèrtin an parmi zot zanfan in bours départmantal pou fé zétide, na poin aryin lé lé folklorik konm sa. I fé ri pou d’bon. Pars, sa lé déyèr nou, dolo la fine koul sou lo pon. Na pi sa koméla.

Na pi sa koméla ?
I pé di sa konm sa. Konmsa, pars sa i kass pa somèy bann moun byn. Zot i pé an avoir la konsyans trankil. Sof ké mi sort lir dann Konsèy rézyonal, déssèrtin la déside done la bours in pé, pa donn lé z’ote mèm si lo komité syantifik l’avé fine fé in bon klasman. Zot la déside, pa tyinbo kont lo klassman é shoizi la tète par zot mèm. Lo rézilta ,in gran l’inzistis rant bann kandida. In pé sak lé méyèr lé rofizé. In pé sak lé byin faye lé aksépté. Lo tan lontan la parti an marshan, la rotourn an kouran.

Sa in folkloz, pou zot, méssyé-z’é-dame, gran grèk dovan l’étèrnèl, pa pou sak lété méritan, é banna la borde ali. La plé va arfèrmé in zour, mé va rèss mal sikatrizé mèm.

Justin