Mi sort lir in lartik Julie la ékrir dann témoignages vantredi, i anparl dsi la manipilasyon par bann pou voir an plass édé par bann média. Mi trouv intérésan anparl sa sirtou dann in pèryod konm sète nou l’apré travèrsé mé la pa la dsi mi vé koz avèk zot zordi. Mi vé koz avèk zot dsi in n’afèr moin la vi étan pti . Kosa i lé ?

Dann son lartik Julie i parl bann fézèr la plui : sa la sort an roman épi an fime l’ané 1956 laba dann l’amérik-si zot i vé gingn zinformasyon la dsi i sifi alé dsi l’internet. Mé mi rapèl in zour moin lété dann la fin lékol primèr sansa pétète moin lété an sisyèm : lo tan lété sèk, sèk, vèye pa koman, la plui téi fé la grèv, é in zour nou l’aprann in ga l’avé in l’aviyon-l’aviyon Samat - la désid sèye fé tonm la plui.

Moin té pti donk mi rapèl pi tro bien koman li té i vé fé mé d’apré sak moin la antann soi li téi i vé transform in niyaz sèk an niyaz la plui, soi li téi vé bonbard lo niaz avèk la nèz karbonik sansa d’ot kalité krito ankor .. . La mètrèss la fé sort bann marmaye dan la kour pou avèye in léspéktak té i vo la pène.

Momandoné, l’aviyon Samat la aparète. Li téi ronf dann syèl vèye pa koman. Nou marmaye, mi pé pa dir azot nou té rasuré san pour san pars nou téi oi déza dann nout tète in kékshoz éstraordinèr téi sa éspasé. L’aviyon la tourné, rotourné, momandoné li la tir in n’afèr konm in bonb dsi lo nyaz. Tout marmaye la plonz atèr par prékosyon… mé la plui la pa tonbé é lo l’aviyon la kol son shomin la parti poz zilo.

Par l’fète mi koné pa kosa la spassé, é moin la antann in moun dir : la plui la tonm an mèr ! Mé ziska zordi mi koné pa koué k’lé vré, kouék lé mantèr ladan. Mi koné zis la séyé, mé la pa gagné…i fo dir la fé novène pou sèye fé tonm la plui mé la pa gagné. Lontan aprésa la plui la tonbé natirèlman.