Kilé la trass bann maron ? Rienk dan nout mémoir, dann paz kayé, dann prosé vèrbal tribinal ? Par-là dann zané 1980, banna la fé in gran dékouvèrt. Bann zo demoun téi ropoz trankilman dann in grot Tapkal, Silaos. Banna la trapé, la konstaté, l’anvoy Paris po étidié, la ranvoy La-Rényon po la konsèrvatris Musée Léon Dierx lépok. Astèr, nana konm in trou noir, in gafourn lorganizasion. Pèrsone i vienbou dir ousa i lé bann zosman-là,
Épisa, pli grav : minm bann rapor d’fouy i niabou pi mèt la min dési.

Parlfèt, tout la bann i afol, i ranvoy la fot linn si lot. La DRAC i di Léon Dierx la pa son Mizé, kinm ali minm nana lo sèktèr arkéolozik si son mizo. Lo Konsèy Zénéral, propriétèr lo Mizé, i présiz bien : la DRAC lé an sharz bann zafèr arkéolozik.
Donk, n’i artourn o poin-n dépar. Kilé trouvay-là ? Ousa la pasé bann rapor d’fouy ? Oté ! koman n’i pé sov nout mémoir, nout listoir, nout kiltir, si demoun i travay po prézèrv ali i vienbou pa mèt zot tèt an plas é protèz in bébèt dékouvèrt komsa ?
Tardra viendra, i fo bien la zistis i pran an min dosié-là.

Justin