Moin lé kandida si in lis minisipal kékpar la Rényon, mi di pa zot ou sa.
Lot zour mon fitir mèr i di a moin, avan in rényon, toué ti va intervnir, bon lé oké ; si koué ? Parl pi tro parti kominis, fine di asé ; ou lé retrété édikasyon nasyonal… oté mé moin la poin riink sa konm idandité ! Mèt pa létikèt « ansiin profésèr » si mon fron, mi vé pa, a koz ?

Pars moin lé pa riink sa ; mi limit pa mon kapasité fé la politik a sa solman !
Par egzanp, mi pé koz si la kiltir, lo kréol, lo maloya, rolasyon internasyonal, minm lagrikiltir, lanimasyon, la formasyon, la vi asosiativ, kominikasyon, média !

Mi giny pa di : « ékri lo non ma komine an kréol si tout bann plak si la rout ? »
Mi giny pa di : « alon ankouraz mèt plis sal sinéma, alon rouv in kleb moring ; akeyi bann zadministré an kréol dann tout biro ; mèt plis maloya an lèr, kréol an lèr ? O lié fé voyaz marmay, zélèv, toultan an frans, anvoy a zot in pé madagaskar, sésèl, mozanbik ; la minm nou sort, bon pé antronou ! »
Mi giny pa di :« dévlop plis la konsomasyon nout bann prodiksyon agrikol dann nout kantine éskolèr ; fé plis koloni vakans, marmay dan lé o dsann dan lé ba ; sak si la kot fé in sanzman dèr dan la fré kan i fé so bord mèr ? »
Mi giny pa di : « form plis bann personèl kominal i okip marmay dan nout zékol ? Okip tout zasosiasyon pareyi : pa dé milion po inn, zéro po lé zot !? »

Koméla nou lé an informatik, tablet ék internèt… mi giny pa parl si foto nimérik, vidéo, transmisyon bloutous ?
Mi giny koz si bonpé zafèr ; limit pa moin ; lès a moin étal mon programe konm mi san a li.
La poin in létikèt si mon fron !

 Justin