Depi lané 2000, le kréol rénioné sé in lang réjional* (konm bann kréol la Martinik, la Guadeloupe, la Guyane). Solman, pou moin, lé shoz i bouj pa asé konm ki fodré : na in sèl klas biling dann in lékol matèrnèl, napoin bann plak an kréol** pou donn z’indikasion dmoun, na poin tradiktèr a titré dann tribinal. Bann piblisité, tazantan, i ansèrv kréol pou angant le bann konsomatèr. Déssèrtin z’asosiasion i donn in pé légzanp.

Dizon nana zafèr pou fé pou mèt in pé nout lang réjional anlèr. La pa pou la fièrté konm par égzanp pou fé gonf nout sheviy. Pou sèrvis li pé rann, riyink pou sa. Pou tousa !
Mi pans tout demoun lé an pozision pou fèr in nafèr, i fo li fé : nout lang la fé anou, nou, kosa nou fé pou li ?

I ansèrv de rien, fé konm di in patoi shinoi : mont si la montagn pou gard bann tig batay dan lé ba. Akoz, na poin rien pou nout lang , si ni fé pa par nou-mem. Nou pé atann, atann mem, la boush rouvèr, na poin rien pou tonm dedan : la poin sosis kui dann vant koshon.

*Article 18 de la loi d’orientation pour l’outre-mer (LOOM)
** napoin non pli plak sré t’i an anglé : la pa for pou in péi i vé aral bann touris.

Justin