Isi la Rényon néna demoun i vé, pou l’avnir, bone rolasyon avèk bann péi loséan indien. Néna osi sak i pasré in kord dann nout tour d’rin pou ral anou loin, pou ratash anou avèk La frans, pou fé obliy anou landroi nout péi lé instalé. Pou lo dézyèm kalité, kas spa la tète pou l’instan : zot lé indékrotab. Indékrotab, sa i vé dir i gingn pa tir la krote dsi zot mèm é par anndan. Mé lé zot ?

Oui lé zot, sak moin la anparl an promyé. Sak i pans bann péi l’oséan indien, ni doi an avoir bon rolasyon l’amityé rantre nou. Mi pans néna kant mèm in minimom rolasyon ni doi an avoir ansanm. In légzanp ? Kan sé in fète nasyonal, sré pa bien ni souète inn-a l’ot ? Nou lé pa oblijé di tout sak banna i fé lé bien, ni domann azot di sak ni fé l éékstra. Nou lé pa oblizé flate azot. Mé kant mèm in minimom.

Pou kosa mi anparl sa ? Pars yèr lété la fète nasyonal Madégaskar é mi trouv nou la pa fé granshoz par raport banna, mèm dizon nou la pankor fé arien. Néna in préfé i roprézant La Frans é mi pans pa li la fé bonpé dézord la dsi. Nou néna in prézidan La Réjyon é in prézidan départman moin la pa antandi azot anparlé. Amoins ké z’ot kanal l’informasyon la pa asé dévlopé é la pa pass ziska koté mon kaz.

Tout fason, sak mi èmré sé in vré rolasyon rant bann pèp. Sirtou si ni souvien nout pasé, sirtou si ni krash pa dsi nout pasé. L’amityé rant bann pèp an zénéral, sa lé bien nésésèr.L’amityé rant bann pèp l’oséan indien, sa ni pé pa s’anpasé si ni vé nout tout ansanm konstrui in l’anvironeman méyèr.
An touléka in pti pé la politès rant bann pèp loséan indien sré pa d’tro avan ni ariv in bon kouran l’amityé rantre nou.