Bann léktèr nout zoinal « témoignages, » pou ban z’anssien — i koné koman la vi politik mèm la vi toukour lété dirijé kont nout parti kominiss épi tout sak téi suiv ali. Par kont bann zéléktèr d’droite viktime nout parti-d’apré lo moune i témoign-lété bien rar.

Dann tan-la nou téi viv dann in diktatir anti-kominiss é toute bann kor sossyal téi partissip sak ni pé apèl shass bann sorssyèr : kissoi la préféktir, kissoi konsèye zénéral, kissoi ankor bann komine dann tan l’avé pwin in sèl méri kominiss, kissoi ankor l’égliz katolik, lo patrona… la répréssion téi sévi in pé partou dann nout sossyété pou lé grann shoz konm pou bann pti zafèr.

Biensir lé bien difissil anparl toussala dann mon bann pti modékri mé mi kroi pa sé pou sa k’i fo éfass lo kayé bann soufranss nout pèp la sibi o nom d’sa la éspass dann tan lontan. Biensir i pé va anparl folklore mé sakla sibi i oi pa sa konmsa é sèryèzman mi panss ziska zordi néna dé famiye lé ankor tromatizé par la pèryode répréssion milti form.

Sirtou ké bann zaktèr la répréssion, zot la pa konète in sor parèye sète bann kominiss la konète é la zistiss la zamé parti shèrch azot landroi zot lété. Folklore ? Non kékshoz bien tromartizan pou nout pèp.

A bon antandèr salu !

Justin