La politik gouvèrnman LaFrance l’apré mète in zanbèk dann nout dévlopman nésésèr. Pars, apré an avoir gaspiy larzan an kantité pou soutyin bann bank, so kou issi, li vé fé pèy toulmoun, san toush bann gro kapitalis. La i sava ségné pou bann ti épi bann moiyin kolon.

Sa lé pa in és-koup.

Sak i shanj sé ké lo gouvèrnman Sarko la déside rante dan lé ran bann bon zélèv l’Erop é sirtou réspèk sak i apèl lo pakt stabilité. Koman li vé fé sa ? Li vé ramène la dète piblik dossou la bar troi pour san. Sète ané, lé a plis dé uit. L’ané k’i vyin v’ariv sis ; é l’ané 2013 sar dos-minos .

Kozé lé bon !

Mé kan i komans aplik lo désizyon sé l’èr k’lé pi doss ditou. Sirtou kan ou i déside, konm di lo konte, fé pèy sak na poin nivo d’vi an sifizans, sak i gingn pa joinn lé dé boute par l’milyé. Akoz i fé sa ? Pars li la poin kamarde la-dan, li la poin dalon. An kontrèr bann rish sa mèm son dalon, donk li toush pa.
Solman, antansyon, li koné byin abiy son poupète shifon. Li la trouv in mo pozitif. Li la invante lo rabo. Oté Baya ! Kisa i èm pa lo rabo, so pti zoutiy i koné si tan tèlman byin galiz lo boi, rann ali zoli. A ! lo rabo ? Sa lé sinpa ! Mé rabote, avèk rabot é, sa lé moin sinpa. Pars, kan i di, in loto la rabote in moun sansa va rabote nout dévlopman, va rabote nout nivo d’vi, va rabote nout bidzé santé… L’èr-la ni konpran myé kossa banna i apèl lo rabo.

Justin