Kan mwin la lir in dézyèm kou lartik l’avé dann noute zoinal, mwin la konprann té in poinn-vizé ofissyèl La Franss donk si ni vé in piblissité fé par gouvèrnman franssé dsi son politik par rapor avèk sète bann gran péi konm la chine, l’Inn, bann zétazini épi d’ote ankor… Fransh vérité la politik indo-passifik La franss lé kontestab dopi lontan é lé touzour kontestab zordi solon mwin..

Kontestab dsi in bonpé poin konm bann zil zépars épi Madagascar, kontestab par rapor bannzil komor, kontèstab dsi la fasson lo péi la borde anou par rapor la COI, kontestab ankor par son manyèr d’soutien la politik lé zétazini. Astèr ni pé dir tazantan néna konm inn-dé signal in shanjman mé lo shanjman lé bien timide é konm i di in zirondèl i fé pa lo printan. Ni atann oir pliss dé sign pou kroir dann in bon shanjman durab.

Toute fasson mi panss ni doi porte atanssion dsu la politik indo-passifik La franss issi dann loséan indien ép dann losséan passifik pars pou bien fèr noré dé shoz a shanjé é pou linstan sé in bann shanjman bien timide-mi diré mèm sa i raporte pa la prèv in shanjma radikal épi dirab. Mé konm i di, amlon suoiv l’afèr pou oir si la politik La franss la shanjé é ziska oussa èl la shanjé pou vréman.

Konm i di dann noute patoi kréol, néna dir é fèr, inn lé bien diféran dé l’ote. A bon antandèr salu !