Konbien n kandida batu ou antan dir : « lo Konba kontinu » ; konm an dotretan na inn la di ,dan larmé : « nou la pèrd inn batay mé nou la pokor pèrd la gèr ! »
Normalman, lo déba démokratik i spas kan nou lé an kanpagn éléktoral ! Asteur zéléksyon lé fini, anon rékonsilié a nou.

Lo travay dan la méri i arkomans, pétèt in not manièr ; pétèt tèl biro va sanz plas, tèl personèl kab giny inn ti mitasyon ; pétèt sanz servis, mé dan lansanm po la popilasyon tou so bann moun dan lé méri lé a nouvo bien a la dispozisyon tout sitoyin, tout administré, démokratikman, républikinnman.
Nou sar pa éternèlman anvoy zargiman la politik si la figir inn lot.

Sèr nou la min ; nout tout konpatriot in minm téritoir ; alon mèt ansanm po fé avansé tout bann dosié la ! Souvan in servis la komine i rann inn, i anserv lot osi !
Pran légzanp dan lé o : in boug i dmann aranz son mir soutènman, ardiriz lo ruisèlman, débous lo kanal po lo la pli i artourn dan la ravine ; i anpès linondasyon son ban voizin andsoud li !
Si mi domann fé in pon koté moin ; tout domoun i sar anprint so pon po zot déplasé din poin a in not !Pa moin tou sèl !

Si mi giny fé abouti in dosié si lélarzisman in somin, in rout… mi fé la domann, mé konbien do moun dot kartié i sar bénéfisié !
Si mi giny fé bès lo pri la kantine po bann marmay lékol, tout paran va profité.
In mèr i kalkil osi lintéré kolektif ; donk, normalman, li na pid zenmi : li nat konpatriot, tout parey.
Si li la pa promèt tro, dousman dousman li va giny satisfèr inn aprè lot ; donn a li lo tan instal a li, li é son konsey minisipal, mazorité ék opozisyon ; aprè, an navan, o travay ; boulo ,boulo.
Sé pour sa ke nou la éli a li.
La politik sé pa toultan la gèr ; sé osi, in moman doné, la rékonsiliasyon ! Zot lé pa dakor ?

Justin