Mi rapèl in pèryode tan l’ékol mé l’avé poin l’ékol pars dann tan-la l’avé in drol de pèst téi atake demoune La Rényon. Si mi tronpe pa sa téi apèl la polyo. In drol de pèst, soi li tyé aou, soi li lèss aou potéké, avèk lo zo maltourné, la marsh an kass in ki, la min rotourné dsi zépol… Alor, figuire azot kan l’ariv la rantré moi d’mars, la pa rantré pars lo préfé la donn lé zord pou pa rantré avèk in shaplé d’shoz défandi : défandi boir lo kri, défandi manz bande frui néna toute alantour la kaz... défandi bègn dan la rivyèr, alé pa dan la mèr-anfin intèrdi viv !

In zour la bate tanbour épi la di la pèst lé fini é lékol va rouvèr san tardé : nou marmaye nou té kontan, nou téi sava oir noute kamarad, noute métrèss lékol é nou téi sar zoué tout gayar zé téi fé lontan... Landomin nou la sorte déor pars nou té anfèrmé plizyèr somenn, pétète mèm kékmoi, é kossa nou la vi : sriz kotlé an poundyak, gouyav rouz é blan, longani pars té son sézon, rézin maron, vavang mir o pyé, prine, zamalak, zanbrozade, zanblon é d’ote é d’ote é d’ote ankor… é la mi anparl solman bande frui pars néna d’iote shoz pou ranpli lo boujaron.

Mézami nou la ratrape lo tan pèrdi, mi pé dir azot pa solman pou lékol, pou lo zé kissoi d’marèl kissoi d’toupi, mé galman pou lo frui nou l’avé an rotar. Kan Prézidan la shanb la koz bande frui, mwin la pans sa é mwin la di lé vré, si ni baze dsi noute prop rishèss noute prop natir ébin néna do koi pou nouri noute kor, néna moiyin pou moiyéné.

Mé antanssioin pou zète bien nouri i fo z’ète bien édiké par noute famiye sansa par noute lékol é sirtou pa baze dsi léguime épi frui i sorte déor mé dsi noute prop rishèss doné-ofèr par noute prop natire.

A bon antandèr, salu !

Justin