Mi koné pa si zot i rapèl zistoir-la. Sa lété dann liv léktir lontan... In boug l’avé in poul é poul-la té i ponn zèf an or. Toulézour li l’avé in zèf la kok an or , sé dir azot si té in bon n’afèr pou li. In zour, in moun la donn ali in l’idé:la di ali, li na ka tyé son poul tèl fason li gingn tout lo bann zèf an in sèl foi épi li lé rish in foi pour tout. Lo boug la kalkilé épi li la tyé son poul ; li la trouv in sèl zèf an or dann lo vant é lé zot zèf té in bann ti guiguine san kok, san l’or, san arien.Li la bien rogrété, mé konm i di : "Rogré i vien aprè la mor !". Fini pou son fortine, fini pou son rishès, astèr i rès ali arienk pou ral piosh pou gingn son soso é mèm pa saé pou ranpli son boujaron.

Pou kosa mi di sa ? Pars konm zot i koné la kour dé kont i sort agard in pé pli pré kosa i éspas dann tourism La Rényon épi dann l’outro-mèr an zénéral é kosa li la trouvé ? Gapiyaz dsi tout la lign, dépans san rotour, éspèryans san landomin. Inn lo tik-tak zil vaniy sé pou fé avans Moris, pa nou.Dé, lo bann vizit dann l’Ostrali la foiré vèy pa koman. Arzout ankor la sibvansyon pou bann biyé l’aviyon i ansèrv arienk bann konpagni l’aviyon, i tyé la konkitrans é i ankouraz pa lo bèsman d’pri. Arzout èk sa, si bann péi konm nou, zot tourism i dévlop, la n’ot i rès an plas. Prézidann réjyon la désid mète lo paké dsi lo tourism, pou fé dékol lékonomi ; Lo kou la manké ; larzan lé dépansé é lo poul zèf an or na pi d’zèf an or, i rès arienk lo zèf san kok pou fé kary in sèl foi.

Astèr, si ni rovien dsi lo problèm prinsipal, lo dévlopman, mi di pa lo tourism i pé pa édé, mé par li mèm li pé pa fé tout nout dévlopman. Mi pans tout demoun na in pé la zizote i konpran bien i pé pa baz dsi in sèl z’afèr, i konpran bien divèsifyé sé la klé nout dévlopman. An dé mo, i fo pa ni mète tout nout zèf dann mèm panyé, mèm si, konm i di dann lo zistoir pou marmay sé dzèf an or.

 Justin