Sak i prétan, gouvèrnman fransé i okïp pa la sékïrité bann sitoiyin, sé in bann sharjèr d’lo. Lé vré pou vréman ! Zot va di : kossa l’ariv Justin ? In rouj de fon konm lï, i pass la lang sou lë pié bann la droit. Mi fé pou répons : moin nana la prèv, la prèv par dë ankor ! Kossa : la prèv par dë i égzis pa ?
I fé rien, moin la invanté. Akout bien :

Dann Paris, nana in lékol matèrnèl, i apèl lékol Rampal. Dann lékol-la, nana tout sort zanfan. An parmi, nana zanfan shinoi. Dé foi, bann paran i travay, lë granpèr sansa la granmèr i vien rod zot lë ti-zanfan. Gramoun-la sé in vyé shinoi, li vien rod son pti zanfan lékol, solman lï la poin papié pou lï rèss an Frans. Tribïnal la di : ékspïls alï ! La polis la fine rëpèr son tourné-viré lèr marmay lékol i sort. Ala zot i ariv, ala zot i sèy kapay alï. In ralé-poussé, mi rakont pa zot !

La diréktriss lékol i pran la défans bann zanfan épi lo vié bononm. Pou èl, la répïblik sé sa : i fo èd sak lé plï fèb. La polis i anbark aèl, i mèt aèl an gardavï sèt èr d’tan.
Ala la prèv par dë solon Justin : la mèt a lord dë moun danjëré.
Momon, mon vyé métrèss lékol dann kèl kalité répïblik nï lé ? La pa sa, ou la amontr anou !

Justin