Kan demoun i pans La Frans la donn é i done ankor bann péi afrikin lo bèr, l’arzan lo bèr, é la krémyèr si z’ot znou, sé in l’opinyon, mé pa in la vérité : La prèv par La Guinée-Konakry.

Mi anprofit lo pti plas nout zournal i donn amoin pou moin anparl dé shoz moin na dsi lo kèr, é bann pèp, malorèzman, na dsi lo do ziska zordi : mi vé parl lo kolonyalism. Sak la fé sanblan alé, mé la bien instal ali dann désèrtin péi.

L’ané 1958, lo 28 séktanm, Charles de Gaulle la fé i référandome pou d’apré sak li téi di, dékoloniz l’Afrik épi Madégaskar. Li la propoz bann koloni rès dann in kominoté sansa kité, domann l’indépandans. Na arienk La Guinée la vote pou l’indépandans. Son shèf, dann tan-la, téi apèl Sékou Touré.

La Guinée la gingn son l’indépandans, mé dann kèl éta siouplé ? Troi mil fransé la kite lo péi épi zot la amenn avèk zot tout sak zot la gingn améné. Sak té i gingn pa, la kasé, la détrui konm pou éfas tout sak d’apré lo kolonizatèr té la kolonizasyon l’avé aporté. Si tèlman ké tout lé z’ot péi la gingn la pèr oir détruir z’ot péi o ka ou zot téi vé l’indépandans.

NB-Lindi nou va oir lo kou d’éta dann lo Togo épi l’asasina son prézidan Sylvanus Olympio.