Dann in sanss konm dan l’ote, mi panss sé sa… Si i vé par ébzanp dévlope lo marshé intéryèr san tro toush bann salèr, ébin i fé in distribission d’préstassion konmsa in larzan pliss in larzan pliss ankor in n’ote é mèm plizyèr sa i done lo pouvoir d’asha é lo pouvoir d’asha sé inn fasson pou dévlope lo marshé intéryèr. Donk si ni vé sé inn fasson pou fé lo dinmping la prodikssion intèryèr.
Mé si par ébzanp néna in ménass dsi lékilib lo bidzé la sékirité sossyal, l’èr-la, toudinkou i parl diminyé bann préstassion : ainsi i pé porte latak dsi lo vèrsman bann préstassion. Koméla i di va mète in moné non rékipérab dsi bann boite médikaman.
Ala ké koméla i anparl la prime Noël.zot i kopné kossa i lé ? Sinploman in prime i vèrs sa pou bann travayèr pov, sansa demoune san travaye é sa i lpèrmète azot gonf in pé zot pla kan i ariv la fin d’lané… Zot i koné sa sé in n’afèr i done tout pov sa é zordi i parl siprime sa pou bann pov la pwin zanfan a sharj konmsa zot va gard dann in trou kan v’ariv li fin d’lané.
Biensir koup in préstassion sa la pa kékshoz lé si sinp ké sa é bann pov i mlèss pa zot fèr mé pou bann drlokite lé pli fassil koupe lo droi bann pov plito ké taks bann iltra-rish pars kan i di sa konmsa, sa i vé dir banna lé anparmi zotr mèm épi zot kamarad dok konm bann ziltra-rish zot lé intoushab…
Intoushab ? Fassil a dir mé pa fassil pou fèr. A bon antandèr salu !

Justin