Mi souvyin in zistoir. Parétré sa in zistoir vré. In zistoir k’i éspass dann in lantropriz milti-nasyonale. L’antropriz-la, i vann dantifris dan la France. Ala k’bann dirizan i romark la vante i bèss. Donkalor zot i kalkil komann rolans lo z’afèr. Zot i mète a kozé, kozé par dsi kozé, l’afèr i avans pa. Na in madam l’apré nétoy karo, li antann lo kozman, solman li koup pa la konvèrsasyon banna… li la poin lo droi. Momandoné, in dirizan i domann lo madam son l’opinyon. Lo madam i ésplik li mète dantifris dépi lo komansman lo pti balé-bross ziska la finisyon. Donk si i grossi lo trou, va ansèrv plis dantifris.
Bann gran dirizan i déside domann lo fabrikan pou fé in trou pli gro.
L’afèr i marsh vèy pa koman é la vante dantifris i ardémar, é kan i fé lo bilan, banna i romark la vante la goumanté. Lo gran diréktèr i réinir son pèrsonèl, i fé in gran diskour, i félisite lo madam pou son sans di rogardaz épi dé l’analiz. Lo madam lé kontan, solman sé lo dirizan ki ramas in prime konsékan... O fète, pou kossa mi anparl dé sa ? Pars mi sorte aprann bann gran fronksyonèr i gingn in prime de rézilta… é lo bann ti-kolon ? Sak i travay la shène, sak i produi ? Aryin pou zot. La prime pou lo gro mazistra, lo pti, li doboute guète.

Justin

NB : I di dann in zournal, lo préfé l’ané dèrnyèr la gingn in prime 53.000 éro pou son bon rézilta. Mi koné pa byin lakèl, mé mi dovine apopré.