I prétan dir, si in moun na diplom, lé pli fasil pou li trouv in travay, sansa shanj travay. Sa in loi lé vré dan la Frans épi dan l’Erop, pars isi, nana si tèlmann shomèr épi si tèlmann d’moun i sort déor pou koup dovan d’moun La Rényon ké i doi zète moin vré. Touléka, si loi-la lé vré, i fo in bon lékol, avèk demoun na bon diplom pou sèye trouv travay. Mi oz pa dir in bon travay, pars koméla, nana si tèlman travayèr pov.

Solman lé pa si fasil an avoir bon lékol avèk bon diplom, sirtou dan la Frans, pars in foi anplis, l’OCDE, in lorganizasyon intèrnasyonal, i sort astik ali. Dabor inn, pars lo péi lé an parmi bann dèrnyé pou mète larzan dann lédikasyon nasyonal. Mèm bann péi l’Erop moin rish ké li i mète plis larzan dan la formasyon épi lédikasyon. Arzout èk sa, bann amontrèr fransé nana pti salèr par raport lé zot péi. Armète la-dsi in politik pou dézanploiye bann fonksyonèr, épi lo tablo lé konplé. La pa domin nora plis diplomé.

Donk lé riskab an avoir plis la délinkans. Pars kan demoun na poin travay é lo posh lé plate, léspri i travay é pa forséman dan bon sans. Donk mon Prézidan la fine prévoir lo parade. Li sava fé trant mil plas la prizon pou mète la jol tout bann kondané, vi k’la zistis i sava travay o-pyès, fé l’abataz. L’èr-la, mèm si gardien nora poin an sifizans, la prizon i mank ar pa nou !

NB : Travay o pyès, travay a la shène, lé parèy.

Justin