Dimansh, moin lété Sint-Sizane pou in konférans éstraordinèr nout Parti kominis. L’avé in foul demoun : bann militan, zot séksyon l’avé donn in misyon pou èt la. L’avé galman bann dirijan, la plipar té la. L’avé osi désèrtin, ni pé apèl bann z’ami lo parti. Total, d’apré sak moin la antann, mil-sink-san pèrsone té i sort in pé tout kartyé, in bon rényon bann kominis pou donn in bon dépar pou bann kanpagn i ariv. Na tro z’imaz dan mon tèt pou moin shoizi, mé m’a shoizi kant mèm inn i amontr koman nout parti nana in tradisyon la solidarité.
Sé Elie Hoarau k’i rakont, mé souvnir-la lé dann fon mon mémoir konm sèt in bonpé bann z’ansien... L’ané 1967, l’avé z’éléksyon dépité. Konm toultan, té i fé la frod. Bann kamarad La Ptit-Il, dann Sid, la désid manifesté. Mé lo pouvoir té i aksèpt pa sa é z’afèr la gaté pars lo moun l’avé asé oir bann préfé épi gouvèrnman pas inn krosh dann gozyé la démokrasi. In bonpé d’moun, anparmi in bonpé plantèr, sar arété zour-la — zot té trant d’apré sak mi ansouvien ! — é in bonpé sar kondané la prizon fèrm. Banna lé plantèr é la koup l’arivé. Koman i sa fé la koup kann ? Lé pa konpliké, lé sinp, lé mèm natirèl, konm la solidarité i doiz’èt natirèl dann Parti kominis. Bann kamarad la roganiz la koup kann bann plantèr té dan la jol : in pé la koupé, in pé la fé transpor, in pé la kart la pay pou lès bann bourjon pousé. La pa rès in pyé kann dobout dann karo.
Kan lo zour l’arivé, bann prizonyé la sort la jol. Zot karo kann lété bien an ord. Paré pou in nouvo kanpagn. Lo mètr la arpoz la min dsi son bitasyon kèr klèr. In gayar l’égzanp la solidarité. In l’égzanp solidarité i doi rès dan nout mémoir. In l’égzanp i fo fé, la pas sa sak i koné pa..., sirtou bann jènn an kantité i rant dann ron la lit èk nout parti.

 Justin