Moin la ésay brans mon marmay si zaktivité réèl, konkré, lo pié i tous a tèr, tèr a tèr minm… Dir,dir.
La lékol i amontr a zot plito lordinatèr, internèt, tablèt, fès-bouk.
Parl pa zot alim in fé po fé kui lo manzé ; alé rod manzé lapin, trap in marto viin èd papa ténir in kofraz, apran fé béton, plant in pié salad… in pié tomat.
Bon la Didié Robert la di li lé pa kontan manièr gouvernman fransé la trèt bann zélu Réyioné kan la fèt lo 30 inm aniversèr la Komisyon Oséan Indiin dann zil Sésèl.

Mé romark a ou, ou la fine war, dann liv marmay lékol, in programe listwar ou zéografi i parl nout rézion india oséanik ; ou lafine war in profésèr lèt donn in tèkst mori , rodrig, sésélwa out zanfan étidié la kaz ; zotèr fransé oui ; zanglé oui, mé kréol non.
La nou lé an plin sézon siklonik, la pli, lo van la pokor fini… ou nora inn ti lanbéli mé mové tan var nni ; ravine va ankor koulé ; radié va ankor débordé ; marmay va mank lékol ; va dézorganiz tout zétablisman ; si programe i fini pa tan pi marmay va ésoué zot zégzamin… pa grav di moman bann gro salèr sirindéksé 4000, 5000 ero i tonm dan la pos bann profésèr, prinsipo, provizèr ek provizèz gran talon !

Lané prosinn nou va rant ankor pli to…a pinn lo ti likèr zourdlan li fine dsann dann gozié i fodra artrap kayié, arkit lo paran po artourn dann klas, ék zinstititèr èk zistititris.
Zordi, mo fi i dmann a moin konm devoir po domin si mi koné lo mo « emphase », aprè lo mo « hyperbole » !
Mi di a toué kréol la lé loin, loin, loin minm !
Falé dmann a moin « zarboutan », « pilié », soubasman !
Fodra in not lékol po nout bann zanfan !

Justin