Donk pou rovnir lo komansman, mi diré La Réjyon néna karantan, é si ni kontèst pa la kantité travaye li la fé, mèm défoi son kalité épi son l’orizinalité , nou lé kant mèm blijé dir pou demoune konm zot é konm moin, demoune normal si zot i vé,oir klèr dann toussala lé pa késhoz fassil. A ! Si zot é mwin, nou lété doktèr an droi piblik, mèm konéssèr dann lo détaye la réalité administrativ osinonsa nou l’avé gingn suiv o zour-lo zour lo shomin fé par La Réjyon nora pa été la mèm shoz, mé sé pa lo ka.

Pou kossa ?

Pars souvan dé foi kan bande zinstitission i fé in gran kantité travaye épi in kantité roflékssyon, nou lo bande Quidam la sossyété ni antan arienk kék sogonde dann télé, ni lir kék lign dann zoinal, é fransh vérité sa i éklèr pa bien dsi lo travaye épi la roflékssyon fé. i fo rokonète la kominikassion i pass mal.Par raporte bande moune la diriz La Réjyon épi zot zékipe sak mi rotien sé la kalité bande demoune-la, épi zot sanss lintéré sipèryèr noute péi par raporte bande zintéré partikilyé .Inn fasson de oir lo péi an majiskil lété bien la dann zot volonté épi dann zot l’akssion...

Astèr si ni vé anparl dévlopman noute péi, ni romark lo dévlopman bande prodikssyon épi zot transformassion la pa sak ni yèmré é mwin la poin konéssans d’in plan d’dévlopman pou noute péi é mwin lé pa sir dann in bande résponsabilité éklaté konm zot lé éklaté, lé possib fèr in plan koéran pou amenn anou dann lo dévlopman pa solman sossyal é kiltirèl mé galman dann sanss noute dévlopman ékonomik zordi anpéshé.

A bon antandèr, salu !

NB Biensir kan mi parl la kalité lo moune mi mète de koté Didier Robert pou la totalité d’son séd’èv.