Mi vyin antann nout prézidant Konsèy zénéral di bann Kréol réyoné pa kouyon : ant èt maryé èk zanfan, tous tèl tèl moné RSA, ou sinon sa viv ansanm an konkibinaz é giny plis lo bann RMI èk dot zalokasyon posib, lo Réyoné i soizi sak i avantaz a li plis, donk li déklar pa son vi konjugal lo bann zotorité !
Bin oui, sa i apèl lintélizans pratik, Fransé i di « pragmatisme ».
La mi vé konstrui in park kabri si in térin abandoné, indivi, lo proprio la di a moin okip ziska li va giny partazé son bien…
Si mi sar asèt griyaz, griy fèr béton, lo kornièr, konbyin i sar kout a moin ?
Alor ké partou domoun, kinkayri, sirtou zantropriz, i zèt palèt bor la ravine, bor somin po kamyon zordir ramasé, a koz mi rékipèr pa sa ?
Moin la bézoin 24 : ma port 2 par 2, dann karo zakasi, mi asir a zot mon 4 kabri sra plis ké dan in lotèl 4 zétoil !
Zot la fine war koman lo moun i zèt fèy tol ?
La mi vyin trouv bann piès, on diré in kaz la brilé, bon piès 10, dawar boi nat, sa lé lour. Mi di mon bann zanfan i èd a moin lévé : sa lété pétèt in pié d’boi dobout an 1850 d’in foré La Rényon. Gard zordi 2013, ni itiliz a li ankor, sa boi d’foré nout péi, sa lé dir ! Ma aranz mon park kabri avèk, li giny in dézyèm vi, ankor 150 an. Moin sra mor, a li la mèm.
Nou lé pov ! agard koté nou, o lié d’zété, domoun i dovré doné. Lé vré, nana sak nana, nana sak i viv dan la mizèr…
Mé… Kréol pa kouyon vréman, la rékipérasyon i pé èt in bon ranpar kont la prékarité !

 Justin