Oté

La Rényon la gingn in raklé zédézil ! Akoz ? Koman ropran favèr ?

Justin / 29 zwiyé 2019

JPEG - 43.6 ko

Mé zami, mon bann kamarad, pétète konm zot, moin osi moin la suiv in pé bann zédézil é moin la di par la fote La Frans lo bann zé lété pipé dopi komansman. Moin la di, in kouran d’èr malsain téi souf dsi bann zé-la, konm dsi tou bann zé la fé avan. Sak moin la fine di, mi ar rovienn ar pa dsi, mé mi pans touzour la mèm shoz. Ni pé diskité, m’a défann mon poinn vizé épi d’ot va défann lazot mé so kou isi néna in kékshoz nouvo.

Zot i konéLa Rényon la fini troizyèm é sak bann morisien va fété lindi sar z’ot viktoir, mé galman sirman la défète La Rényon é sa sé in n’afèr i doi fé plézir azot, mé nou sa va lèss anou lontan in mové gou amèr dan la boush. Pou kosa ? Pa pars La Rényon la fini troizyèm, a pars èl la pa gingn lo zé konm souvan dé foi èl la gingné. Mé La Rényon té krazé ! Ala sak i fé mal anou é va fé mal anou in bon pé d’tan dann nout domin.

Ni pé poz anou bann késtyon sinp : pou kosa La Rényon té krazé konmsa ? Pou kosa in bonpé éspor nou téi fé bon rézilta é so kou isi nou la fé mové rézilta ? In pé va di : sé pars ni fé l’éspor pou son valèr étik, é pa pou lo rézilta. L’inportan la pa gagné mé partisipé ! Poitan, si mi tronp pa, l’inportan-dann léspri bann roganizatèr, konm sète bann zatlète - lété d’gagné é pa solman partisipé. Nou lé loin d’aoir gagné é si ni rogard bann rézilta ni pé mèm di la koziz anou.

Mi pans, inn foi lo zé lé fini, i fo sèryèzman ni intéroz anou pou konète, si nou la pèrd par mové roganizasyon, par mové shoi nout stratézi, par mank moiyin, par mank lorgèye épi la fyèté an parmi nout bann konpétitèr ? Ala in ta késtyon ni pé poz anou. Konm ni pé poz anou in késtyon bien sinp : lékip La Rényon sa té in lékip La Rényon sa ? Dann lo sans nout bann kon pétitèr téi vé fé gingn lo péi-La Rényon. Si sé sa, sé sinploman in késtyonn moiyin. Si sé pa sa sé in késtyonn fibr lamour épi la fyèrté nout péi. Si nout fibr lamour épi la fyèrté pou nout péi la firamézir lo problèm la pi ditou sak mi sort di anlèr-la.

Ni pé goumant tan k’ni vé, lo bann moiyin, ni trap ar pa in bon rézilta par raport bann péi nout zalantour. Si sé l’anvi pou nout péi ké nou na pi-ké bann zatlète, lo bann zantrénèr é lo bann roganizatèr na pi, l’èr-la, i fo rodonn la fyèrté nout bann konpétitèr é sa la pa késhoz fasil. Mi diré mèm, mi oi pa koman rodrèss la bar.