Na in komik, la-ba dan la Frans, la di souvan dé foi é pa riyink in foi : la Frans lé divizé an dé... sak i pans la Frans lé divizé an dé, épi sak i pans pa konmsa !
Mi konpran ali : sa in manyèr plézanté, in manyèr farsé. I pé pa pass lo tan aryink pou pléré, kant mèm !
Mé kan ou i pans problèm nana dan la vi in pèp, la vi in péi..., sa i fé pi rir !

Kan i di nana plis la moityé d’moun La Rényon lé dossou lo sèy povreté, donk vréman dan lokisité avèk tout kalité problèm banna nana pou rézoud tou-lé-zour, shak-zour : dolo pou péyé ! kouran ! loiyé an aryèr ! manzé k’i mank... sré in pé long pou drès la list !…

Kan i di, anparmi bann shomèr déklaré, bann jenn sé plis la moityé : pou pointé, pou alé oir la tèt lo konséyé, pou alé port-an-port, pou domann siouplé, pou antann kozman la famiy k’i konpran pa k’na poin travay.

Pass pou in parésé, pou in finyan, pou in gratèr d’gongon, sa i fé pa plézir. É nana an kantité bann jenn konmsa, nana in ta, avèk in paké ! La Rényon lé divizé an dé, é sé pa in bon z’afèr pou nou... Sa i fé pa rir pèrsone !

Justin