Oté

La Rényon zordi konm in viktoir pou nou, sansa konm in défète a san pour san ?

Justin / 27 zwiyé 2018

JPEG - 43.6 ko

Zot i koné bann péi dan lé z’alantour, souvan défoi, lé in pé zalou par raport anou. Pou zot, isi tout lé fasil par raport shé zot. Isi néna l’éro é si pa toulmoun néna in bonpé, néna kant mèm in trépé, é lo moun i pé dispozé.

Biensir sa la pa ariv konmsa : konm k’i diré kaye frit la pa tonm dirèk dann nout zasyète, é l’égalité sosyal nou la mète dé z’ané é dé z’ané pou gingn ali-dizon kaziman sinkant zané apré la vote la loi l’ané 1946. Nou la bataye in bonpé ! Nou la lite in bonpé ! Zot i souvien, momandoné Paul Vergès épi Elie Hoareau la démisyone konm dépité pou fé in éskandal laba dann Pari, dovan l’opinyon fransèz. Sé pou sa Laurent Vergès laba dann l’asanblé la déklar : « Nou lé pa plis, nou lé pa moin, réspèkt anou ! ».

An touléka, nou la fini par gingn l’égalité sosyal san gingn l’égalité ékonomik, pars nout dévlopman olèrk avansé la kil an aryèr si tèlman nout bann prodiksyon kolonyal la dékliné konm taba par ébzanp, konm vétivèr, jèrniom, kann épi d’ot ankor . Si tèlman nou la gingn kaziman in nivo d’vi éropéin, san gingn in dévlopman nout prodiksyon intéryèr konm in bonpé péi l’erop é san étinn bann voyan négatif i klèr o rouz konm lo nonm zilétré, konm o bann domandèr l’anploi, konm ankor la kantité d’moun dosou losèye povrété épi d’ot ankor ni sava pa nonm tèrla.

Pou kosa ? Dabor pars nou la pa gingn zamé lo pouvoir pou dévlop nout péi. Pou kosa ankor ? Pars gouvèrnman lété o sèrvis bann monopol fransé épi éropéin. Mi diré osi, sé pou anpèsh anou in zour koup la kord nout dépandans par raport La Frans dann lo ka ni trapré nout dévlopman !.. Lé vré, ni pé dir, rézilta ni koné kisoi pou la médsine, kisoi pou l’instriksyon, kisoi ankor pou lijyène é pou l’alimantasyon, kisoi si ni vé lojman épi bann rout é d’ot shoz ankor sé par raport lo politik transfèr piblik. Moin la pa anparl la kultur, mémi pans néna la dsi in bonpé n’afèr pou diskité.

Astèr mi poz in késtyon : zot i pans sak nou la gagné d’bon dopi 1946 lé konm in viktoir nout part épi bann progrésis rényoné dsi lo kolonizatèr avè konm poin noir nout maldévlopman. Sansa konm in pé i pans lo kolonyalis la ranport dsi nou in viktoir a san san pèrmèe anou ranport lo pli pti viktoir-li noré fé la politik li vé san k’ni ariv a inflians ali mèm in iota. Dan lé dé ka o konba lé pan kor fini é i rèss in bonpé pou nou fé.