Mon bann dalon, zot i souvien lo gran bataye la fé dann tan isi La Rényon, bataye rant l’égalité épi la parité ! Zot i souvien mi éspèr an touléka sak la amenn lo bataye i doi raplé.
Dann tan-la, in bann rastakouèr té i prétan asist bann rényoné dsi lo poinn vizé zalokasyon familyal. Zot té di : mèm zalokasyon ké dann La frans mé tienbo dsi pou la kantine, tienbo ankor pou lékol militèr Tampon, tir ankor dsi pou d’ot kouyonad. An parmi l’avé in dépité i apèl Zan-Pol virapoullé la débark dann l’asanblé nasyonal avèk in pil plate épi li la di donn pa bann famiy lo mèm zalokasyon pars lo bann papa va fé arienk boir La Rak : sé dir si li té i fé konfyans lo pèp... Bann partizan l’égalité té i di vèrs bann famiy zo zalokasyon, zot va konète koman amènn z’ot larzan, zot va trouv lo moiyin pou moiyéné.

Zot va dir amoin sa téi éspas dann lo tan d’otrefoi, mé fransh vérité, sa i éspas ankor zordi dsi d’ot poinn vizé. In l’égzanp : ni gingn larzan l’érop pou la formasyon, mé sé l’érop i di anou sak i fo fèr avèk larzan épi li kontrol bien pou oir si nou la akout ali konm zanfan tann. Astèr rogard ankor bidzé konsèye zénéral, si mi tronp pa, tout lo larzan la fine afékté lign pou lign, poin pou poin, pos pou pos-i rès arienk lo rotaye pou désidé...

Konm ki diré dann tan zangazé isi La Rényon : an déor inn dé grin la monaye téi travaye près arienk pou manzé kui… Asé avèk sa oui ! Arète in kou siouplé ! Lé l’èr pou nou komann anou kant mèm ! Nou vé prann nout résponsabilité, in bon prinsip mé domaz laplikasyon i fé défo.