Na in bonpé z’afèr i fatig nout pèp rényoné koméla. Mé an parmi nana sak i apèl shomaj-la, pou demoun, sa in pyèz mortèl. Kisoi pou bann jenn, kisoi pou gramoun, kisoi pou sak lé rant lé dé z’az. Antansyon mi di pa sé lo shomaj li-mèm k’i fé mal kréol mé tout sak li amenn : dsi la késtyonn l’arzan, dsi la késtyon out l’idéal dan la vi, dsi la késtryonn l’antant dann la famiy, dsi out santé, dsi out kontant man dan la vi…

Shomaj sé in boubou sosyal, mé sé osi in boubou ékonomik é li mète aou an difikilté dann tout konpartiman out vi. Souvan bann gran dirizan i di pa va trouv travay pou bann shomèr, i di va trouv in solisyon. I pé z’ète in kontra, i pé z’ète in formasyon, an fouyan bien i pé z’ ète d’ot shoz ankor konm in rokonvèrsyon. Zot i oi bien na késkshoz k’i klosh pa la-dan. Koman i démèrd dann in pyèz konmsa ?

I di na na par-la 135000 domandèr d’anploi katégori A : sa bann moun na poin in grin konm travay, alé oir nana arienk 880000 rényoné. Na d’ot katégori ankor : sa sé l’moun k’i artrouv pa zot dann sak zot i fé é i rode kékshoz myé pou zot. Na poin lontan, Paul Vergès la di si i kré dis plas travay par zour, i fo plis karant z’ané pou donne ytravay demoun san konté sak i ariv an apré ané dsi lo marshé di travay. Dizon sé in zékouasyon san solisyon !
San solisyon sof si i désid kass avèk lo sistèm ké ni koné. La riptir ? Na arienk sa pou fé kan l’a fine ariv dann sète éta.