Mésyé zé dam, la sosyété, koz èk moins é koz èk in kouyon, mé o pyé d’lo mir i oi lo mason. Provèrb nou la mark zordi sa in provèrb l’afrik mé li pé z’ète vré pou La rényon an mèm tan. Pou kosa mi di sa, Pars zot i koné bien isi shé nou néna in bonpé rivyèr sansa ravine i koul pa toultan, mé kan zot i koul Baya ! Tansyon pangar : in laksidan lé vite arivé... Mé oila, ni parl in provèrb mé kosa li vé dir pou vréman ? Sanm pou moin li vé dir abiz pa dsi la provokasyon, kroi pa demoun i siport lo linsiportab pars momandoné i pé sort sé gon é kan li sort sé gon malèr i pé arivé. Bann kasèr lé kui, pran gard ! alé, mi kite azot rofléshi la dsi é ni artrouv pli d’van. Sipétadyé.