Noré di, pandan la kanpagn éléktoral, nouvo prézidan la répiblik lavé konm in baguèt mazik. Noré di li lavé in résèt pou fé goumant larzan.
Alor ou té antan ali dir : i lès arpa tro kouri bann défisit bidzétèr ! S’pandan va limit lo boukliyé fiskal ! Va siprime bann droi pou érité ! Va bès bann kotizasion sékirité sosyal ! Va goumant lo bann z’èr siplémantèr... I pèy arpa linpo dési... étsétéra, la ké lo ra !

La nuit demoun i rèv : tout lé mazik ! Granmatin i révèy : bann vyé doulèr koudkogn i arvien ! Pou moin, la ni tard pa révéyé la : ni antan déza konm inn dé son ni èm pa .
I fo mèt droit lasirans maladi. Va mèt in spès franshiz dési : la pa in ëro, sar dis épi sar pa riyink sï vizit médsin, sar galman sï lanaliz, lo radio, lo médikaman. Va mèt in TVA sosyal, siou plé ! soman ou va pèy sa sï out dé-pti komisyon. Va réform lo RMI. Va... la list lé long !

Ay-ay-ay ! Boug-la, i sar mèt anou dir la ! Pa bann rish : pou zot sé alèz-Blèz ! Mé pou bann ti kolon, sar pa parèy ! Kant a bann finans La Frans ? La dan la poin mirak ! Konm diré l’ot :
« La rob Fifine lé kourt, koup par an-o, alonz an-ba ! »

Justin