Témoignages - Journal fondé le 5 mai 1944
par le Dr Raymond Vergès

Accueil > Chroniques > Oté

La rob Fifine lé kourte, koup par an-o , alonz an ba

jeudi 18 août 2022, par Justin


Mézami kan i parl lanploi sa lé sir, i sava malkontante demoune pars sa lé rar konm korn lapin é dopi dé zané i oi pa vréman in gouvèrnman gosh konm droite fé in plan sèryé pou done travaye demoune é diminyé lo shomaj.


Yèr midi édmi dann zoinal Rényon promyèr i di dann tite Lo SDIS i fé in apèl pou demoune an franss vien konm pompyé volontèr issi La Rényon. Sa sé in n’afèr i tonb bien vi ké dan la somenn mèm bande sindika i s’anplègn néna poin assé pompyé issi la Rényon é i domande bande volontèr pou alé tinde dofé dan La franss .

Si lo zoinalist i poz késtyon néna in sindikalis lé la, épi li pé ansèrv son tan d’parol pou dénons in n’afèr konmsa.Mé oila sak téi okipe ali sé lo nonb zour laré-maladi, lo mal-ètre bande pompyé, mé li té pa okipé anparl rokritman d’moune laba dan La franss.An kontrèr li oi sa konm in moiyin pou ranpli bande kamion-ponpyé.

Poitan noré a dir dsu in n’afèr konmsa ! Noré késtyon pou pozé la dsu ! Kansréti pou domande si bande volontèr-la i sava shomé sansa i sava pran la plass bande travayèr rényoné .Si zot lé pou rèss lontan volontèr sansa vitman-vitman zot i dovien proféssyonèl.

Pou mwin sa dsé ankor in manyèr pou insult bande travayèr la Rényon. So kou issi i anparl bande ponpyé, mé domin sar d’ote kalité travayèr é anpliss ké sa, lo plan pou dévlope La Rényon donk l’anploi, plan-la lé konm la lign d’orizon, i éloign firamézi wi raprosh.

Pandann tan-la ande voiyan o rouz i vir o rouz fonssé é bande rényoné lé bordé par raporte lanploi é olèrk tir toute rényoné dann mèm sans i tir a-hu a-dia san rode lintéré nout pèp rényoné é anpliss i ansèrv sa pou abèss anou-a bon ékoutèr salu.

Nb Lo responsab lo sdiss la pa lo mèr Salazie sa ? in gran sèrvitèr la koz rényoné konm nout toute i koné.


Un message, un commentaire ?

signaler contenu

Plan


Facebook Twitter Linkedin Google plus