Mézami, mi sorte bate in karé dann in gran sirfass. Si mi di azot sé pou mon plézir mi dépassré mon pansé, si mi di azot sé inn késtyonn nésséssité, l’èr-la lé pli vré. Alon pa kass la tète pou lo motif di pourkoi mwin la pass dann in gransirfass mé sé lokazyon pou mwin anparl azot d’in n’afèr. Kossa i lé ?

Sépa si zot i koné mé kan wi pass la kèss wi pé pa pass ninporte ékèl kèss : néna inn pou demoun handikap, inn pou pèye avèk la karte lo magazin, plizyèr pou pèye an shèk, an karte blé, épi mwin la pa vi mé mwin lé sir néna guishé pou pèye avèk larzan likide. Dsi la késtyonn likide mwin la vi in pti l’afish téi di-mé sa sé dann in magazin dann la galri- i pran pa pliss mil éro an likide ; toussala dizon lé in pé pou mwin konmsi téi koz shinoi avèk mwin mé lé konmsa é mi éspèr sak i fé zafish-la i koné sak zot i fé, épi zot i réspèk la loi kolonyal.

Mi vé anparl azot in guishé éspésyal, sak i pran bann shèke an diféré. Donk l’avé dsi in l’afishète avèk an tite shèke diféré, donk lété marké sak i ansèrv bann shèke an diféré pou la pèryode kinz avril ziska trante avril i doi konète lo band shèke sar ankéssé lo sink mé. Ala in drol zafèr mé lé pa difisil pou konprann : akoz lo 15avril ziska 30 avril ? Akoz sink mé ? Dabor pars d’apré in bonpé d’moun a partir d’lo kinz na pi larzan donk lo magazin i donn in kou d’min. Akoz lo sink ? Pars band zalokasyon lé vèrsé dsi lo konte lo sink mé sansa dan lé zalantour.

Alor mézami, si mi di azot sa sé sinploman pou signal in foi anpliss néna bonpé d’famiy lé pa kapab zoinnd lé dé bout par lo milyé é banna opliss i sava opliss zot i instal azot dann lo prékarité é sa i vé dir in vré plan konte la mizère lé pliss ké d’aktyalité. An atandan kabri i manz salade, é kan la robe fifine lé kourte i koup an-o pou alonz an ba, mé sa la pa in solissyon.