Oté

La rocherch ? Sa i pé fé partou sa ! La prèv par tizane zèrbapik dann la Guadloup

Justin / 15 mars 2021

JPEG - 43.6 ko

Laba dann La Guadloup néna in laboratoire i apèl Phytobokaz. Néna inndé somenn li la déklare li la fé in tizane i apèl virapic avèk konm baz in plante i ansèrv in bonpé laba dann lo péi i apèl zèrb-a-pik é d’apré sak i paré sré in bon pé éfikass pou ranfors la rézistanss lo kor-i apèl sa liminité inné - kont bann maladi i trap avèk bann virus konm kovid 19. Tizane-la i apèl lo virapic.

Dann lo péi demoun lé kontan, lé fyèr é lo moun i prézante déza tizane-la konm in médikaman i pé fé mirak kont lo covid. Lé vré k’i fo pa fé la bou avan la plui, pars bann zéssé klinik la pankor komanssé. Mé lo moun péi-la i di avèk rézon zèrbapik-la sa lé bien koni dann la médsine tradisyonèl konm valab pou fé bann tizane zèrbaz.

Damien Bissessar, in moun i travaye dann laboratoir Phytobokaz,., in chimiste d’apré sak mwin la antann dir - la di lo molékil zèrbapik zot la fine tésté, néna in laksyon favorab kont in lanzime DHODH i pèrmète bann virus ARN roprodui azot-i di répliké dann kozman bann savan.. Donk si i anpèsh azot roprodui lé possib i blok la maladi. Mé nou va oir par la suite.

Astèr i fo atann bann zéssé klinik, mé an atandan de moun la parti ashté l’éstok virapic néna dann bann farmasi pars zot i koné demoun koman i lé : Maladi-la i fé pèr é sak la pèr li ashté sak li pans sé in médikaman mirak… Mé la pa tousala, mi fé mon modékri pou dir koméla, in pé partou i pé fé la roshèrch syantifik é sa sé in shomin rouvèr pou bann pti péi avanssé.

Issi la rényon néna déza in bonpé d’moun i travaye dsi ann plantaz trdisyonèl é in bonpé lante la fine rante dann sak i apèl la famakopé fransèz. Ni pé oir sa kon m in l’anons pou domin, sansa apré, d’in lindistri médikaman avèk konm baz noute bann plante i anmank pas hé nou La Rényon. Zèrbapik dann la guadloup ? Pé sfèr in bon nouvèl pou nou galman La Rényon, pou nout lindistri médikaman mank ar pa dévlop in zour, issi, shé nou, dann nout péi.