Néna kék zané lo sid té an difikilté é la fain téi atake ali an promyé : uit san milyon d’moune téi soufèr la fain, l’èrla la fé in gran rényon épi shakinn la fé son promèss é téi falé tir in milyar é la prèsk arivé. An promèss. An promèss solman, pars an réalité bande péi lo sid la pa vi la koulèr toute lo larzan é mi rapèl bien la famine la kontinyé é bande zanfan, konm bande demoune dann la frazilité lété touzour a popré dann mèm sityassion.

Zordi i parl in n’ote afèr sé d’réform tout-o-tou lo sistème larzan dsi lo plan mondyal....Kan la di sa, sa la rapèl amwin in n’afèr é kan mwin la ékoute la miniss Sénégal mwin la konpri kossa sa téi rapèl amwin. Mézami zot lé pa péyé pou kroir, mé néna dë zané, zour pou zour, bande péi lokssidan l’avé fine pran langazman réform lo sistème larzan mé l’avé pa fé pou dé késtyonn kovid épi d’ote shoz.

So kou issi lo Prézidan Makron la di zot i sava fé...

Ki vivra-véra, mé si dann dë zané i arfé lo promèss- lo mèm promèss-sé ké néna kékshoz la éspassé. Mé néna in promèss sé trouv san milya d’dolar pou ède lo sid dann son tranzission klimatik. Ni souète sa i ariv vréman mé nou la pa sir alor mwin néna mon fasson pèrsonèl ékoute lokssidan, sé la parol in komik rényoné téidi konmsa : « Konte touzour, fyé pa tro ! »

A bon antandèr, salu !