Oté

« La rolijyon in moun lé dann son kèr »

In kozman pou la rout

Justin / 30 septembre 2020

JPEG - 43.6 ko

Mésyé zé Dam, la sosyété, koz èk moin sé koz èk in kouyon, mé sé o pyé d’lo mir k’i oi lo vré mason. Mézami, kozman-la d’apré sak moin la lir sé in kozman l’afrik mé konm mi di li pé z’ète vré in pé partou. Pou koué mi di sa ? Pars konm zot i koné souvan dé foi dann l’istoir lo pouvoir politik la fé présyon-mèm réprésyon-dsi bann kroiyan pou zot abandone zot rolijyon épi pran la rolijyon ofisyèl, sète lo dominèr. Isi la Rényon, la plipar d’tan té la rolijyon katolik . Sa té mèm marké dann lo kod noir (art 1 i aviz bann juif-art 2 i parl la konvèrsyon bann zésklav) mé sak i fé ofisyèlman lo moun lé pa sansé aplik ali dann son vi privé, dann son kantasoi. Ala pou kosa isi la Rényon demoun néna dë mèm troi rolizyon. Pou kosa ? Pars zot la kashète sa dann zot kèr é kan lo moman té favorab sa la ropran favèr. Sak lé vré isi, mi pans lé vré partou ousa konm moin la di la fé présyon-réprésyon dsi l’moun ziska dann zot kroiyans. Alé ! mi kit azot rofléshi la dsi é ni artrouv pli d’van. Sipétadyé.