Mi souvien an avoir vi in boug, gayar, kosto, épi for, épi jènn ossi. Li l’ariv nout kaz pou li vni di bonzour son linstititris. Sa, in madam toulmoun téi èm sa pou vréman si tèlman èl lété zantiy, si tèlman èl té i iz son santé pou fé pass bann marmay lé-o z’ot sèrtifika ;
Boug-la lavé parti fé la guèr madégaskar, épi, fièr vèy pa koman, li té i rakont son guèr : koman li la rante dan la kaz demoun, koman li la kapote marmite dé ri, mélanz manzé èk la salté, épi bril in vié malgash avèk koukoune sigarète. Lo vié té i kri waï-waï, bril pa moin, é li, li té i kontinié akoz sa té i fé rir !

Mon momon la toiz ali in kou épi la domandé si lété sa li lavé aprann lékol. Lo boug la près rant dan la tèr si tèlman mon momon téi rogard ali sévèr. Apré, lo linstititris la di son zansien zélèv - èl té i èm bien poitan - artourn son kaz akoz èl i frékante pa bouro.

Zistoir konmsa moin la antann si tan tèlman. Si tan tèlman nout bann konpatriote la fé soufèr bann moun Madégaskar. Alor mi di, koman banna va fé pou pardone anou ? Koman zot va travay avèk nou, kèr klèr ?

Kansa, nou ossi, nou va fé nout ropantans, kansa nou va dmann pardon pou l’tor nou la fé banna olèrk tir soman z’ot défo. Fransh vérité, la ropantans, sa lé pou nou ossi !

Justin