Mi koné pa si zot i rapèl de sa, pars sa i dat in pé... L’avé in réktèr té i apèl Gioux. A tou lé kou, in boug la pa invant lo tyèd ! A tou lé kou, in boug té i èm pa nout kréol rényoné ! Figuir azot, lo boug la trouv moiyin fé in sirkilèr pou rapèl tout demoun, lo sèl lang la répiblik té lo fransé, é lé zot lang lé pa otorizé dan l’administrasyon, dan l’ékol, mèm la kour l’ékol. An plis ké sa, pou fé pèr Kréol, li la trouv in l’éspès tèks 1885 (si mi tronp pa) fé éksopré pou pini bann moun i koz breton... L’avé déza in for mouvman pou défann nout lang kréol rényoné, donk lo boug la gingn in sak kozman, mé son bann shèf la pa donn ali tor, é bann gardien-nervi la lang fransèz lété kontan avèk li.

Lo tan la pasé é zordi zot i koné la lang fransèz lé touzour la dan la Konstitisyon, mé bann lang réjyonal zot osi nana zot plas, pétèt pa asé, mé kant mèm in plas, é lo kréol rényoné li lé rokoni konm lang réjyonal la Répiblik fransèz, le breton li osi lé bien rokoni. Si tèlman bien ké Harvard i sort désid amontr lo bréton dan so l’inivèrsité bien ronomé konm zot i koné. Le tan la pasé, lé vré, mé la rézon la fini par fé son shomin. Tan-myé pou lo breton : sa sé in gran promosyon pou li. Mi oi sa konm in gran rokonèsans pou li é pou bann Breton, konm pou sak nout bann z’ansèt i sort La Bretagn.

M’a rakont azot in z’istoir : nana kèk z’ané, lo vin désanm 1988, lo minis l’Outre-mèr sosyalis, in sèrtin mésyé Le Pensec, la vni pou sélèb la fèt rényonèz la libèrté an plin dann Konsèy zénéral. Plizyèr pèrsone la kozé, an parmi lo prézidan Konsèy la kiltir, mésyé Robert Gauvin, sirman fatigé par lo mépri inn dé l’avé pou nout lang kréol, la fé in diskour pou di son rosantiman épi li la larg lo fraz k’i sui : « Lé défandi koz kréol, lé défandi krash atèr ». Sa la sonn konm in kou d’fizy dann zorèy lo minis té i èm bien son lang bretone. Sa la rapèl ali bann z’afish banna té i mark : « Lé défandi koz breton ! Lé défandi krash atèr ». Pou bien anfons lo klou, lo prézidan komité la kiltir la mèt lo fraz an breton. Li la di : « Difennet eo krainchat war an douar ha konz kreol ! » — i vé dir lo mèm z’afèr moin la di an o-la. L’èr-la, lo minis la di avèk li : « Sak ou la di la i rès ar pa la, é m’a konèt donn la suit k’i fo ! ».

Zordi, konm moin la di an o-la, le breton la rant Harvard. Nout kréol rényoné lé rokoni. In paké lang réjyonal galman... La rou i tourn mon bann dalon, la rou i tourn ! Dann bon sans.

 Justin