Mi sort antann in n’afèr, sanm pou moin lé bien intérésan. Zot i koné l’afèr térin l’aviyon notr Dame dé-Land. Mi pans zot la antann tout son tourné-viré. Zot la antann sirman lo préfé la pran désèrtin l’arété l’itilité piblik pou fé avans so prozé-la. Mi sava pa rakont azot l’aktyalité pars sé in n’afèr koni, la fine pass dann télé sépa konbien foi. Dèrnyé kou la ziska fé in référandome popilèr…

L’afèr la parti dovan la zistis administratif dsi la késtyonn bann z’arété l’itilité piblik lo préfé la pran. Dann lo promyé instans tribinal administratif la valid lo bann z’arété. Aprésa bann moun i vé pa i fé lo térin l’aviyon la domann rapèl : so kou isi dovan la kour l’apèl administratif. Figir azot ké so kou isi, i arsanm baton i shanj de bout pars lo komisèr lo gouvèrnman i domann i anil lo l’itilité piblik dsi bann l’arété.

Pou kosa ? Pars pou fé lo térin l’aviyon i fo détrui in milyé natirèl imid. Sa i pé fé si lé obligatoir san pour san. I pé pa fé si nana in méyèr solisyon é si lo milyé natirèl i rann plis sèrvis ké lo konstriksyon ou i sava fé. I paré sé pa lo ka é la kour administatif l’apèl, i spé bien, i kass kat arété l’itilité piblik. Mi koné pa si va fé pou vréman mé si i fé, lé posib l’afèr lo nouvo térin l’aviyon va pran in nouvo tournir k’i apèl - tournir katédral kasé.

Bin sa, so rout an mèr, so boushaz la mèr avèk galé, lo karnaz l’apré fé dann l’oséan… Mèm ké lé riskab détrui nout bébé résif latanyé, in résif l’apré formé, in mèrvèy la natir é anplis nana in gran l’itilité épi bann karyèr i vé fé partou dann in milyé natirèl frazil. Sa lé dovan la kour l’apèl administratif Bordeaux sa ! Donk ni pé domandé si nou va oir so rout an mèr, sansa si li va fini son karyèr an katédral kasé li osi.