Oté

La rout an mèr : tanka mal fèr , otan malfèr konm k’i fo !

Justin / 1 zwin 2018

JPEG - 43.6 ko

Mé zami, mi sort anparl azot in kozman La Rényon i di : « sak lé dan la tète lé pa dann la zanm ». Néna ankor in n’ot kozman i di : « Poisson i pouri par la tète ! ». Zot i konpran bien la tète sé in n’afèr i zoué in gran rol dann tout sak ni fé. Pou in l’antropriz dizon sé son diréksyon, dizon ankor sé bann zarboutan ou i pé apuy dési pou fé marsh l’antropriz, sé dann tout l’androi néna lo bra épi néna la tète.

Sa sé pou di azot si la tète i fonksyone pa konm i fo é si son liézon avaèk son bann baz i marsh pa bien lé fouti pou vréman. Astèr si ni vé amiz in pé la boush ni pé dir : la tèt i donn pa délégasyon la boush pou manzé, la zanm pou marshé sinon pou louri, lo poin pou tapé. Pou kosa mi di sa, Pars néna in n’afèr i pèl la rout an mèr. Néna in n’afèr i apèl konsèy rézional la donn lo zinstriksyon pou konstrui so rout la korèktoman.

Dann tout shantyé néna problèm. Mé k’i di problèm i di osi solisyon é souvan dé foi sak la pass komann kékshoz li lé dan l’obligasyon vérifyé si tout z’afèr i roul ron. Mé moin néna konm l’inprésyon gran shantyé-la, i marsh a kou d’milyar, li lé pa piloté kon m k’i fo. Sé pou sa i ariv problèm par dsi problèm, é in pé i domann azot si va oir in zour lo bout, lo bout, lo bout so rout an mèr la.

La pa ké moin lé pou sa !
Pars pou moin sa lété pa pou fèr in n’afèr konm sa é si in zour li fini, ni koné pa ankor dann kèl traka li sava mète anou, nout bann zanfan épi nout bann ti zanfan. Moin néna in dalon i di toultan an parlann se rout-la : tanka malfèr, otan malfèr onm k’i fo ! Mi pans pa moin la bien konpri sak li vé dir, mé kant mèm dan lé z’apépré. Pars, san pou moin, li koz pa la boush rouvèr, so boug-la.