La sézon zéléksyon l’ariv ankor. La nou lé dann dézyèm round. Tout gronad lé bon astèr pou dégoupiyé, tout mansonz lé bon pou di provik li lé di dann ton la vérité. Pou kosa mi di sa ? Pars néna inn-dé zour l’avé in déba rant lo dé kandida dsi Sin-dni. Promyé mouvman moin la pans tinn lo télé, pars kinz minite kozman Didier Robert sé in pèrt tan, mé oila, moin la pans m’a ékouté apré dafalgan va dépane amoin.

Boudikont moin la pa pèrd mon tan pars moin la antann in kékshoz, i vo son poi an taye kabri. Donk DR la di avèk Erika, la rout lé fini pou katrovin pour san. Katrovin pour san ? Rozman moin té asiz pars sansa moin nora kalbité, sa lé sir. Apré moin la kalkilé : moin la pans lo bo Didier sé in sharjèr ‘lo mé i ariv ali fé pass in vérité. Si li di lé fini pou katrovin pour san sa i vé dir dann son tète katrovin pour san de sak li pans La Réjyon va fé, donk katrovin pour san lo bout rout li kont fé.

La vérité lé la, é lo prézidann réjyon li avoué sinploman. Li di li sava pa fé in rout antyé mé in morso sinploman, alé oir li la di lo kontrèr dopi dé zané é dé zané. Mi koné pa si sa é in kékshoz la peuz dsi son lang é dsi son konsyans mé moin pèrsonèlman moin la rogrète ankor in kou gramoun Vèrgès la kite anou. Pou koué ? Pars avèk li nou nora gingn in rout kat voi épi in tram train. Mé toulmoun la pa Paul Vergès pars li fé parti bann gran bononm nout listoir. Tanka DR li va gingn son plas an parmi bann kanar boiteux.

Lèr-la moin la pans inn dé provèrb moin la lir rna poin lontan : sète i di « mansonz la pate lé kourt » ; sansa ankor « mansonz i done flèr i done pa frui ! », « a bo mantir sak i sort loin » é néna d’ot ankor é ankor. Ala kékshoz la donn linspirasyon bann saz é dopi pli lontan ké lontan.